O Señor Agustín era un pozo de ciencia. Estaba dotado
dunha grande intelixencia natural e admirábame como, coa súa carencia de
vocabulario e falta completa de preparación ou formación cultural, era capaz de
enfrontarse na conversa con moitos temas de difícil expresión.
Eramos veciños de
porta e, nas longas noites de inverno, viña para a miña casa a compartir
soidades. Era unha delicia escoitar a súa maneira de narrar cun estilo sinxelo,
fluído. Contaba a súa vida, as súas andanzas, as penas, as angustias...
Como tódolos vellos
durmía pouco. Contábame que lle producía moita angustia cavilando nas longas
noites de insomnio o lento transcorrer do tempo. Dicía do sono:
Unha hora dorme o galo /
dúas o cabalo /
tres o santo /
catro o que non é tanto /
cinco o estudiante /
seis o camiñante /
sete o teatino /
oito o pelengrín
/
nove o cabaleiro /
dez o maxadeiro /
once o mociño e doce o borracho
Era un pequeno
filósofo e sempre falaba por sentencias, frases tópicas ou refráns. Era
raposeiro, cazurro e moi tiránico coa súa familia. Unha vez rexeitou a un mozo
que quería casar coa súa filla Manela. O mozo viñera de Cuba e dis que traía
moitos reais. O día que veu trata-la voda cos seus futuros sogros, sentados
todos no escano da lareira, o mozo sacou dous puros, un para o sogro e outro para él. Meteu a man no peto e sacou unha caixa de mistos para prende-los puros. Ó día
seguinte o pai dille á filla: do casadoiro, nada; pois é un home gastador. Se
había lume na lareira, ¿Para qué tiña que gastar un misto?
Dicía da muller: se o home malla á muller cun pau e a muller cunha palla; gaña
a muller.
O día do patrón da parroquia, un neto pídelle
uns patacóns para ir a festa. O avó, cheo de noxo, dille:
- ¿Non
comiches ben,? ¿Non bebiches ben? Logo, ¿para qué queres os cartos?
Pero ó final, dálle unha peseta:
- Toma, rapaz; pero ¡que non vexa nin sol nin
lúa!
No hay comentarios:
Publicar un comentario